سنشتري البوليس كما اشترينا المريخ

• مباراة الزعيم الهلال أمام البوليس في ذهاب الأبطال الثانية ظهراً (آي والله).. والفوز نذراً.. وعداً وتمني.. لنعيد ذكرى ملحمة الترجي الكبرى في استاد الوطن الهلال. 

• لن يبطرنا الفوز بالرباعية المتل رباعية النخبة في ودية سيمبا التنزاني..

ولن نكابر وندعي أننا قد بلغنا تمام الجاهزية وفريقنا مية المية ومدربنا.. بساوي مية.. لا وربي لا شاهدنا المباراة ولا وقفنا على تطور مستوى الأداء، ولا تابعنا مستوى الخصم كي نعرف مواطن القوة والضعف. 

• الحقيقة الصادمة الهلال اشترى سيكافا وسيمبا «معاً».. يسمعن عاشقات الوطن الهلال إني.. أقر واعترف..اشترينا سيكافا بقروشنا.. ورجعنا اشترينا مباراة سيمبا التانية اللت أول البارح كمان).. والليلة مجلسنا مجتمع عشان يشتري مباراة البوليس الكيني.. مريخاب سجلوا اعترافي دا في سجلاتكم للدنيا والتاريخ تحت «علوان» هلالاب البلد أسيادها.. ما بننكر اشترينا.. وأول ما بدينا بدينا بيكم ومنكم مشينا.. يا أهل الله: ناس المريخ باعوا لينا ونحنا اشترينا القمة «اللت» الدامر.. والنخبة حلوة حلا..(آي والله).. كلو ما تجي سيرة الرقم أربعة  لساني بتمطق والنخبة تسوي (بق.. بق.. بق.. بق) بالأربعة.. استنوا استنوا البيع ما وقف على النخبة.. المريخ يا أهل الواطة جت بعد النخبة دبل لينا البيعة، عرض بضاعته ونحنا اشترينا كاس السودان (بي حقنا).. وكمان بااااع لينا محمد المصطفى وكرشوم، وعرض علينا كانتي قلنا ليهم لا كانتي وكته لسه ما جا.. قالوا لينا شيلوا فوق البيعة قلنا ليهم لا نقبل الصدقات.. عاد النبي الرسول فيكم القطاعة اكان ما حفظتوا اعترافاتي دي.. قوموا لفوا.. شاحده الله يلف بيكم (سهل ولدنا الهلالابي) في السهلة ويمرق منكم مرقة النمير. 

– كل ما حقق الزعيم الهلال انتصار (بقت) فيكم النار .. لا طفاها الله.. وتشيعوا في حادثات الإفك.. التفتوا إلى مريخكم هداكم الله فهو أحوج للنهوض من كفوته.. أفلا تستحون والمريخ (يسمه) ما فاز بكاس الدوري المحلي من سنيين (آي والله).. والعجب العجاب لم يبارح التمهيدي.. لو حقاً انكم مشجعيه وماكم مشحودين عليهو.. كان زمانها الدنيا مسخت عليكم .. ونسيتوا الملك الهلال والعالم وما فيهو.. واتفرغتوا لانتشال المريخ من الدرك السحيق. 

يا حليل زمن المشجعين الصاح الأخوان الأعزاء الراحل تمساح وخالد ليمونة ورفاقهم.. قوة سمو الملك الهلال من قوة المريخ حتماً، التفتوا إلى ناديكم ودعوا الزعيم وشأنه. 

• غادر المنتخب سباق الترشح إلى المونديال بخفي (معتصم وعطا المنان).. ولن نتعشم خيراً في البطولة العربية ولا حتى في الأمم الأفريقية في ظل العقلية التي تدار بها المستديرة في بلادي، لا الحكومة قايمة بي دورها تجاه المنتخب علماً بأن كل بلدان العالم حكوماتها تتولى الصرف على منتخباتها عدا منتخبنا .. غير طيارة البرهان الحكومة ما شغالة بيهو .. والعجب العجاب وزير الرياضة والشباب الجديد لنج ما (مستعبر) المنتخب ولا سائل فوقه، والإعلام هدام (يا قلبي لا تحزن)

• نبض العشق السرمدي.. يكفي النيل أبونا والهلال سوداني.. ويبقى العشق ما بقي الهلال(زرقـاء الـعشق-أستراليا)

شارك المقال