قصيدة لم تنشر .. للشاعر الراحل مبارك بشير
مبارك بشير- تصوير عصام عبدالحفيظ.
• قال
الشاعر عن زمن بعيد :
ما بشبهوك
من بيت علم وادب سلوك …والطيب مع
طيب الخواطر والجمال
الضاوى فى الليل الحلوك.. يابت ملوك
ام بت مكوك .ايه الفرق
شمبات وحلفاية الملوك؟
ما بشبهوك. …
مياسة فى نفح الرياحين…بسامة فى
وش المساكين …
بلسامةلى وجع العيانين
والحسان ..ما بلحقوك
ما بشبهوك ….يا طالعة
من عالم غريب
عالم عجيب
يتهادى زى شفق المغيب
نورك على وهج النجوم
نعسان ينوم ….فاهك
رضع عسل الكلام
والابتسام ….خدك
حرير .. تأشيرة لى
سفر المحبين والغيوم
والعيون نبع الاغانى
والامانى المستحيلة
والمشاعر مستعدات
للشجن ..
العيون روعة وطن
خلتنى اتحدى العذابات
والغيابات والمحن
عشرة الريد الشديد
خلتنى انهض من جديد
و دخلت بيك عالم جميل …عالم سعيد
وكتبت فى سفر الهوى
ونار الجوى..
انت سارح فى البعيد
لا ليك شبيه لا ليك نديد
ما بشبهوك ….
تشبه عبير الذكريات
تشبه رحيق الاغنيات
تشبه الحلم الجميل
لامن صحينا لقينا فات
تشبه حكايات المحبين
اليتامى..
يوم قالوا ليك اهلا حبابك يا حبيب الناس
جميع لو تستطيع ..
انت قلت مع السلامة !
ويبقى باقى املنا فى
الشمس البتشرق لى
ملايين الحيارى…
ما بشبهوك ….!
شارك القصيدة
