(حواري .. معاي)
خالد شقوري
شاعر وكاتب صحفي.
• اسمك؟
– اسمي بحسو نغيمة يمة
وكت تندهلي
تعال يااااا خالد
• رسمك ولونك؟
– لون الطين الأغبش لوني
وبشبه ناسنا
وكلنا واحد
صوتي مودرو صوت (البربخ)
وصدري ملان إحساس وقصايد
• الميلاد؟
– في حلة بسيطه
وفي يوم ناير
في يناير
وصادف عيد الشعب الصامد
• طيب .. جنسك؟
– أنا سوداني
وولد النيل
والبحر الأحمر
وخور القاش
ورهيد اب دكنه
وجبل التاكا الشامخ شاهد
• هوايتك؟
– اكتب..
وانسج قافية لطيفة
ومرات أرسم
شدرة وريفة
وبهوى أكون طورية وساعد
• وعطرك؟
– نفح السمحة القمحة
وريحة الطينة
و(طِرقة) يمة
وأوضة أبوي الطول راقد
• حزبك؟
– حزبي مع البيقول ويسوي
وضد الزول البنضم وقاعد
• أحكي طموحك؟
– إني أكون لبلدي إضافة
وأقدر أشيل هم غيري وأساعد
• وحلمك؟
– حلمي وطن
نسقيهو أماني
وحب وتفاني
حاضرو مفرهد
وباكرو .. ولا واحد بيعاني
وماسك درب النهضة وصاعد
• كلمة أخيرة؟
– وياها الأولى
ونبدأ نراجع من سنة أولى
ألف الإلفة ولام الليم
وسين السترة
وواو الود
ودال درب الله
وألف الأخضر
ونون النيل والنبت الطيب
ونية الزول الشاكر وحامد
شارك المقال
