أغنية جديدة: موجوع أنا
رانية عمر - القاهرة
تايه مع السفر الطويل
ما بين هواجس الإنتماء
وضياع ملامح دهشتِك
أنا كنت يوم منك وليك
أنا كنت صوتِك وضحكتِك
وسَكتَّ لحظةْ قُلتي لي..
«ما قادرة أتعرف عليك»..
هاجرت منِّك وقلبي ليك
لا قادر أسكن في سماك
لا عارف أهجُر سِكّتِك
موجوع أنا..
والهَم سرق طعم
الحكايات القديمة
وساقني لى سكّة سفر
وَدَّرني بين صحرا ومطر
ما بين جفاف العيشة
والجوع البيقتل
كل يوم حلماً جديد
وما بين حنان صوت البِنَيَّه
الراسمة من البهجة عيد
وأنا كل يوم أهتِف واعيد
وأنادي لى حلمي البعيد
ويرد عليّ صوت الوجع
مالك عليّ بس يا وجع؟!
أنا كنت بس عاوز أعيش
لا حلمت بى جاه الملوك
لا بالقصور العالية
لا المال الوفير
أنا كنت بس عاوز أعيش
لا لحظة اتمنيت غِنى
لا رِفعة لا منصب كبير
أنا كنت بس عاوز أعيش
لا يوم سَرَحتَ مع الوهم
لا قُلتَ أتوسّد حرير
وأنا كنت بس عاوز أعيش
واطرح همومي عليك
وأسرح في سَمَاك
وأتناسى بيك همي وضناي
موجوع أنا ومكتوم غُناي..
في وحشة الغربة البتهرد في حَشاي
ناديت وبالِك ما معاي
عانيت وقلبِك ما معاي
سافرت بيكي وتاهت الآمال وراي
أعفيني منك يا مُناي
يا إنتي يا حلمي المكتّف بى شقاي
أعفيني يا الموسومة
بالوَجع الملطّخ بى دماي
موجوع أنا..
شارك الأغنية
