قصيدة جديدة: فى الليل
حنان شاهين - القاهرة
في الليل
و انا وحدي
و الدنيا سكون
و الشارع هس
النسمة تفوت عالارض تحس
و الوحدة تباصي الذكرى
لشارع ضيق
مفتوح عالأمس
الليل بيعبي اكياس النايلون ريح
و يدحرج ورق الشجر الناشف عالاسفلت
و يصفر يعلن عن مباراة هزلية
و مش متكافئة ما بين الكل و بيني
اتخبى من المجهول ورا سور
و السور بيعدي منه الميت بس
يطلع من شق في قلب العتمة ايدين بتشد هدومي
و عيوني على وحمة في قلبي تبص
و ياخدني الخوف و الصمت
علي ناصية ذكري بعيدة
و اشوف في الساحة عيال
بلعبوا غميضة و يغموا عيوني
و لاول مرة اشوف عفريت
بيحدف طوب في عامود النور
و يطفي سجايره في عين الشمس
في الليل
و انا وحدي
و الدنيا سكون
و الشارع هس
بيمر من الشارع حاوي
علي كتفه جراب
بيطير منه يمام أبيض
و حكاوي عن جن و انس
و يمد ايديه و يطلع من جوايا قبضة نور و يمدها تاني و يطلع نار
يتمشى في كل شوارع روحي
و يوقع بيني و بين جنية
حبساها سنين
و يحضر كل بنات الجن معاها
و يعملوا حفلة زار
يرقصوا حواليا
و يعلى الصوت
أرقص و أدور
تنفك زراير روحي
و يتبخر خوفي
و أتعرى تماما
كما أول مرة ولدني نهار
أرقص و أدور
و تدور حواليا الأرض
أرقص و أدور
و تدور حوالين الأرض الشمس
أرقص و أدور
و يدور حوالين الشمس الكون
أرقص و أدور
و أحس كأن أنا مركز هذا الكون
في الليل و أنا وحدي
و الدنيا سكون . . .
شارك القصيدة
