حُلُومُر

مشاهد نادرة
وحاجة تسُر
لا في كتب الغير شفناها
ولا في بلدا تاني كُتُر
لا مجرودة..
ولا موجودة
غير في دار العازة الحُر
عند الفاشر وبارا وكسلا
وود النورة وصاي وأمدر
أو فى كل المدن السمحة
وفى انحاء الوطن الغُر

صور بتعبر عن سيرتنا
واننا ناس جوانا خُدُر
البنريدو نغني نشيدو
ولو غلطان بنكوسلو عُذُر
بلد متفرد وصمتو بغرد
قلبو بياض وعيونو حُمُر

عندنا نحن ..
سبيل الموية..
ولعب التوية وقولة كُر
والعدمان ..
القلبو ملان..
ومن دكان الحلة يجُر
والنفاج.. بين الحيشان
بيهو صوانى الألفة تمُر
عندنا نحن العفو والعافية
وكت الموت.. للسوه الضُر
وكم بيناتنا حزين بيغنى
وكم بيناتنا سعيد بيصُر

مناحة وسيرة ونفس النغمة
وفي الحالتين دمعو بيقطر
برش الطيبة
الفوق الحيبة
وللبيجينا المافى نجيبا
ومن جوانا نصيدلو الدُر
ونفحة نسمة مع رمضان
عامرة حنان وصفا وحُلومُر

شارك القصيدة